• umuyobozi_muccfb-d9acc

    Umuyobozi Mukuru w’Itorero ry’Abadiventisiti ku isi yasabye Leta y’u Burundi kubaha uburenganzira bw’abayoboke b’itorero rye

    Yanditswe na IBYIRINGIRO May 14, 2019

    Pasiteri Dr. Ted N.C Wilson,aratabariza abayoboke b’Itorero ry’Abadiventisiti  b’umunsi wa 7 mu Burundi nyuma y’amezi menshi batotezwa anasaba Leta y’u Burundi kubaha uburenganzira bwa muntu burimo n’ubwo gusenga. Uyu muyobozi […]




    Pasiteri Dr. Ted N.C Wilson,aratabariza abayoboke b’Itorero ry’Abadiventisiti  b’umunsi wa 7 mu Burundi nyuma y’amezi menshi batotezwa anasaba Leta y’u Burundi kubaha uburenganzira bwa muntu burimo n’ubwo gusenga.

    Uyu muyobozi avuga ko hashize amezi hafi atandatu abayoboke b’itorero rye batotezwa bakanafungwa babuzwa gusenga nkuko byakagombye.

    Ati “Guverinoma yabujije Itorero ry’Abadiventisiti gukora binyuze mu buyobozi bwacu bwatowe mu Burundi, kandi bwaratowe mu buryo bukwiye, bwemewe n’amategeko n’Ishami ry’inama nkuru y’Abadiventisiti b’Umunsi wa karindwi muri Afurika y’Iburasirazuba n’iyo hagati nagerageje kubibwira perezida Nkurunziza ariko nta gisubizo nabonye”.

    Yongeye ho ati “Turamusaba n’Abaminisitiri ba Guverinoma ye gukurikira amategeko mpuzamahanga, amasezerano y’Umuryango w’Abibumbye ndetse n’ay’Umuryango wa Afurika yunze Ubumwe yo kubaha ubwisanzure bwo gusenga ku Barundi bose ndetse no kwemera ubuyobozi bw’Itorero ry’Abadiventisiti bwatowe muri iki gihugu”.

    Pasiteri Dr. Ted N.C Wilson yavuze ko ibi binyuranyije n’amahame y’ubwisanzure mu gusenga,imyemerere n’imitekerereze.

    Ati “Ibi ntibyemewe n’amategeko na busa, binyuranye n’amahame, imyumvire birengera ubwisanzure mu gusenga ndetse n’ubwisanzure mu mitekerereze no mu myemerere”.

    Akomeza agira ati “Ndasaba Abadiventisiti b’Umunsi wa Karindwi bose gusengera abagize itorero ryacu mu Burundi, babone ubwisanzure mu gusenga muri kiriya gihugu kandi harekurwe n’Abadiventisiti batawe muri yombi”.

    Pasiteri Dr. Ted N.C Wilson yasoje asaba Abadiventisiti bo m Burundi kudacika intege kandi ko Imana n’itorero batabibagiwe.

    Kuri ubu Past. Lamec Barishinga,umuyobozi w’itorero ry’Abadiventisiti b’umunsi wa 7 mu Burundi arafunzwe kimwe n’abandi barenga 20.

    Itorero ry’Abadiventisiti ryatangijwe n’abagabo barimo  Joseph Bates,James White,Ellen G. White na J.N. Andrews ni rimwe mu matorero abarizwa mu ba porotestanti rikaba rifite insengero mu bihugu byinshi byo ku isi ubu rikaba ribarwa ku mwanya wa 6 mu kugira abayoboke benshi kuko isi ubu ituwe n’abagera kuri milliyoni 20 babatijwe muri ri torero.

    umuyobozi_muccfb-d9acc
    Pasiteri Dr. Ted N.C Wilson aratabariza abayoboke b’itorero ry’Abadiventisiti mu Burundi                                                                                                                                                                                                                                                                                                                                                                                                                                                                                                              @Ibyiringiro


    Leave a Reply


    Ibitekerezo